లండన్ డ్రీమ్స్

ఒక కాకికి సంగీతమంటే ప్రాణం, అందరూ వ్యతిరేకించినా, పట్టుదలతో సంవత్సరాల పాటు అకుంఠిత దీక్షతో సంగీతాన్ని ఔపోసన పడుతుంది. తన కలని నిజం చేసుకునే క్రమంలో తన స్నేహితుడైన ఎలాంటి శిక్షణ లేని కోకిలను బృందంలో చేర్చుకుంటుంది. కోకిలకు శిక్షణతో పనేంటి! కాకి సంవత్సరాల తరబడి కష్టపడి సంపాదించిన ఖ్యాతి కోకిల ఒక్క రాత్రిలో సంపాదించడంతో కాకి అహం దెబ్బ తింటుంది, కోకిలను కూలదోయడంలో కాకి సఫలమైందా అనేదే మిగిలిన కథ.

ఇక సినిమాలోకి వస్తే కాకి అజయ్ దేవ్ గన్ కాగా కోకిల సల్మాన్, వీళ్ళ బ్యాండు పేరు లండన్ డ్రీమ్స్. ఇదే బ్యాండులో అసిన్ ఒక సభ్యురాలు. సంగీత ప్రధానమైన సినిమాలో శంకర్ ఎహసాన్ లాయ్ ల పనితనం కనబడింది. ఈర్ష్యాపూరితమైన పాత్రలో అజయ్ బాగా చేసాడు, దాదాపు సగం సేపు కళ్లద్దాలు పెట్టుకున్నాకూడా తనలోని ఈర్ష్యాభావాన్ని ప్రేక్షకులకు చేరవేసాడు. స్నేహమంటే ప్రాణమిచ్చే అమాయకపు పల్లెటూరి వ్యక్తి పాత్రలో సల్మాన్ కూడా బానే చేసాడు, ఎటొచ్చి అసిన్।కే సరైన ప్రాముఖ్యంలేనిది, కేవలం హీరోల వెనక చేతులూపే పాత్ర. అజయ్।కి బాబాయి పాత్రలో ఓంపురి కొన్ని సన్నివేశాలలో కనిపిస్తాడు.

ఇక లండన్లో నడిపే బ్యాండులో హిందీ పాటలు పాడితే తెల్లవాడు ఏడ్చేటంతగా మైమరచి పోవడమనేది పంటికింద రాయిలా ఉంది. సినిమా దాదాపుగా కథానాయకుల మధ్య సన్నివేశాలే కనబడుతాయి, అజయ్ తన కలను నిజంచేసుకునే తీరు పెద్దగా చూపలేదు బహుశా నిడివి పెంచడం ఇష్టంలేదేమో. కథలైపోయినాయి అనేవారికి ఇది ఇంకో ఆయుధమే, కథకు మూలాన్ని స్వాతికిరణం నుంచి గ్రహించినప్పటికీ కథనం బాగుంది. విశ్వనాథ్ గారి సినిమా లాంటి సినిమాని ఒక కొత్త దర్శకుడు(విపుల్ షా) తీయగలగడం నిజంగా అభినందించవచ్చు. ముఖ్యంగా రెండో సగంలో డ్రామాని ఎక్కడా దారి తప్పనీయ లేదు.