ఉప్పిగాడు - ఇంకో ముక్క

మన ఉప్పిగాడు అందర్లాగే ఒకరోజు పుట్టిండు, గదెప్పుడు అనే దాని మీద ఎప్పుడూ బొందలు తవ్వుకుంట ఉండే సర్కారు జీతగాళ్ళు(పురావస్తు శాస్త్రవేత్తలు) కిందామీద పడ్తున్నరు, ఆల్లే గంత ఇది అయితున్నరు కాబట్టి మనం దాని జోళికెల్లద్దు. ఇగ వాడెక్కడ పుట్టిండో తెలుసుకునే ముందు జర ఆని అవ్వ, అయ్యలెవలో తెల్సుకోవాలే గదా. ఆని అయ్య పేరు నిప్పు కుటుంబ రావు, అమ్మ పేరేమో రామగిరి సంతాన లచ్చి. అదేంది మద్దెలచెర్వు సూరి, వాళ్ల ఇంటామే పేర్ల లాగ ఇంటి పేర్లు కలవలేదేంది అన్పించిందా, జర చెప్పే దాంక ఆగరాదు. మన కుటుంబరావు ఇంటిపేరు బీ రామగిరే కాకపోతే కుటుంబరావు ఎక్కడ ఉంటే అక్కడ పొగొత్తది(సిన్నప్పుడు కరీం బీడీ, తర్వాత విజయ్ సిగరెట్లు తాగేటోడు, ఇప్పుడు గోల్డ్।ఫేక్ కింగ్ సైజైతే తప్ప ముట్టడు), ఆని సోపతిగాళ్లు పొగకు కారణమైన నిప్పుని ఆని ఇంటి పేరు కింద మార్చి పిలిశి పిలిశి పిలిశి పిలిశి పిలిశి(అసలే ఏండ్లు పూండ్ల కేండ్లి పిలవ వడితిరి ఇంకో పది సార్ల 'పిలిశి' అని రాద్దామనుకున్నా కని ఇంకా రాత్తే కొట్టేటట్టున్నరు) అదే ఆళ్ళ ఇంటి పేరయ్యింది. ఆ జంట పేరు కుటుంబ రావు, సంతాన లచ్చే అయినా మన నిప్పుకి గొప్ప దేశభక్తి ఉండవట్టి ఇద్దరి తోనే ఆపేశిండు.

గా ఇద్దరిల పెద్దోడే మన ఉప్పిగాడు ఉరఫ్ ఉపేంద్ర, ఈడు పేరుకు తగ్గట్టే మన కన్నడ ఉప్పిగానికి సెకండరీ ఫ్యాను. ప్రైమరీ ఫేవరేటు మన తెలుగుల్నే ఉన్నడులే(గది సస్పెన్స్, ఎవళ్ళ ఊహలకు ఆళ్ళనే ఒదిలేత్తాన). ఇగ సరింగా కతలకు పోతే, మన ఉప్పి గాని ఊరు రామన్నపేట. దీన్నే ఆడి జిందగీల ఎప్పటికైనా ఉప్పన్నపేట అని మారుత్తరని ఎదురు సూత్తన్నడు. ఈడు పుట్టిన కాడినుండి 'కిక్కు' సైన్మాల రవితేజ టైపు, కాని ఆనికి ఈనికి కొద్దిగ ఫరక్ ఉన్నది. గా సైన్మాల వాడేం జేశిన హీరో కాబట్టి ఆనికి కిక్కు అత్తది, పాపం మనోడు హీరో కాకపాయే ఈడేం జేశినా ఈనికి 'ఎక్కు' అత్తది (తప్పుద్దా 'ఎక్కు' అంటే ఏంటిదో చెప్పలె గదా, గిది ఇంగిలిపీసు ముక్క ఎక్ అంటే హెడ్ ఏక్, హ్యాండ్ ఏక్ గట్లన్నమాట. గిట్ల రాయద్దని ఎవలన్న అంటే మన తెల్గూ సైన్మా పాటల్ రాశేటోళ్ళ దగ్గరికి తోలుత, మరి లేక పోతే గ్రేటాది.. గ్రేటుడు, స్నేకాది.. స్నేకుడు, ఉన్నప్పుడు ఈ ఎక్కు గూడ ఉంటది). గా కిక్కు సైన్మా అచ్చినప్పుడైతే సైన్మాల హీరో ఆని లాగనే జేశుడు సూశి సంతోశాన్ని ఆపుకోలేక ఏడిత్తే రామన్నపేటకు ఉన్న మూడు చెర్వులు నిండి రైతులు ఆస్మాన్ దిక్కు సూడకుండనే రెండు పంటలు తీశిండ్రు, పాపం అప్పటికీ మనోని పేరు ఆ ఊరికి పెట్టలే. మామూలుగా ఎవళ్ళన్నా ఒక పని జేసుట్ల తోపులైతే ఆల్లకి ఉగ్గుపాలతో నేర్సుకున్నడంటరు, కాని మన ఉప్పిగాడు తింగరి పనులు జేయడం ఉగ్గుపాలు తాగకముందే నేర్సుకున్నడు. ఈనికి పుట్టుడు పుట్టుడే ఏదో ఒక తింగరి పని సేయాలనిపించింది.

పుట్టీపుట్టగానే ఈడికి ఆ డాక్టరు గాడిని ఎదవను జేద్దమనిపించి పుట్టగానే ఏడ్వలేదు, పాపం ఆ డాక్టరు జరంత పరేషాన్ అయినా ఓపిక వట్టి ఓ రెండు నిమిషాలు సూశిండు, ఈడు పెద్ద జగత్ కంత్రీ అని ఫిక్సయిపోయి ఈడు కండ్లు మూసుకొనే ఆ డాక్టర్ని దొంగసూపులు సూత్తాండు. ఆ డాక్టర్కి పరేషాన్ పెరిగి మొఖంలనే ౩డి సైన్మా సూపెడ్తాంటే ఈడు కిస్స కిస్స నవ్వుకుంటాండు, ఇంక ఆ డాక్టరు ఈడు ఉన్నడా పోయిండా అని కాల్లట్టుకొని పైకి లేపి ఉపుతాండు, పోరడు ఏడ్వక పోతడా అని. ఆడేమో ఉయ్యాల ఊగుడు మంచిగున్నది అనుకుంటా ఆని అయ్యని రోజు కెన్నిసార్ల ఉయ్యాల ఎక్కియ్యమనాలే అని లెక్కలేస్కుంటున్నడు. ఇప్పటికైనా ఎడిత్తే పోయేదిగా, ఊహూ అట్టా ఏడిత్తే మన ఉప్పిగాడెందుకైతడు. సాధారణంగా ఒకడ్ని బిస్కట్ చేయడానికి ఇంకొకడేవడైనా సుమో పెడ్తడు కాని మన ఉప్పి గాడు పెట్రోలు పోయించుకొనొచ్చి మరీ సెల్ఫ్ సుమో పెట్టుకోవటంలో దిట్ట.ఆ డాక్టర్కి పరేషాన్ ఎక్కువై ఎన్నుల ఓక్కటి ఇద్దామని చేయి పైకి ఎత్తిండు, పరేషాన్ల సూసుకోక పోయేసరికి సెలైను సీసాకెట్టిన సూదొకటి డాక్టరు చెయ్యితో బాటొచ్చి అంటీ అంటకుండా మనోడి ఈపు మీద సంతకం చేశి పోయింది. అది ఆడి జిందగీ మొత్తం ఆని ఈపు మీద పర్మనెంటు సంతకమైంది.

గిసోంటి సెల్ఫ్ సుమో పనులు శానా చేశిండు, అప్పుడెప్పుడో టివిల అచ్చిన ఏదో భారతం సైన్మా సూశి ఈడే భీముడనుకొని ఫిక్సయ్యిండు, ఐనోడు ఊకుంటడా దాన్ని ఎట్లైనా అందరితోని నిజమని ఒప్పియ్యాలే అని రకరకాల ప్రయత్నాలు జేత్తన్నప్పుడు టివిల ఒక అడ్వర్టైజ్ మెంటు సూశిండు అదే "మహరాజ మిక్సి" ఆ మిక్సీ వోడు ఎఫెక్టులు గట్టిగుండాల్నని గా మిక్సి కొండల్నే పిండి చేశినట్టు సూపిచ్చిండు. గది సూడంగనే ఈని సుమో షెడ్డుకు పోయి టైర్లల్ల గాలి కొట్టిచ్చుకొనొచ్చింది. ఈడు ఎంఠనే పోయి ఈల్ల మిక్సీకి ఓ జార్ పెట్టి సిచ్చేశి రడీగున్నడు, ఆడి ఎధవ ఐడియా ఏంటంటే కొండల్ని బండల్నీ పిండి జేశిన మిక్సీని చేయి పెట్టి ఆపాలె అని. గట్టిగ బ్లేడును పట్టుకున్నడు, ఇంగ గ్రైండరు మీద కట్క నొక్కడమే. కరెక్టుగ ఆడు కట్క నొక్కిండు అది పది సుట్లు తిరిగిందో లేదో కరెంటు పోయింది, గా పది సుట్లల్లనే ఈని ఏలు తెగి అర లీటరు రగతం మురిక్కాలవలకు పోయింది.
ఇంగ గిట్ల శెప్పుకుంటపో మస్త్ అయితది మల్లోసారికి శెప్పుకుందాం.