కల, కలకు కల, కలలో కల వెరసి కలకు 'ఇన్।సెప్షన్'

కథ చెప్పడంలో ఉద్దండుడు దర్శకుడు క్రిస్టోఫర్ నోలన్ (christopher nolan), తన గత చిత్రాలైన ఫాలోయింగ్, మెమెంటోలతో కథ చెప్పడంలో తనకంటూ ఒక శైలిని ఏర్పరుచుకున్నాడు. ఏంతో సంక్లిష్టతతో కూడుకున్న 'ఇన్।సెప్షన్' కథను వీలైనంత సరళంగా చెప్పడానికి ప్రయత్నించాడు, ప్రయత్నమైతే చేసాడు కాని కథావస్తువులో ఉన్న సంక్లిష్టత చూస్తున్న వాళ్ల మెదడుని క్షణం కూడా విశ్రాంతి తీసుకోనివ్వదు. ఇప్పటివరకు ఈ దర్శకుడు తీసిన ఫాలోయింగ్(విధ్యార్థి దశలో ఆరువేల డాలర్లతో తీసిన అద్భుతమైన సినిమా, సాధారణంగా ఇండిపెండెంట్ చిత్రాలలా ఇది హర్రర్ సినిమా కాదు) తర్వాత తన సొంత రచనతో తీసిన మొదటి సినిమా. మిగతా అన్ని సినిమాలు(Memento, Insomnia, Batman Begins, The Prestige, The Dark Knight) నవలలనో లేదా కామిక్ పుస్తకాలనో ఆధారంగా తీసినవే. ఈ కథ తయారు చేయటానికి దాదాపు ఎనిమిది సంవత్సరాలు పట్టిందట.
ఇక విషయాని కొస్తే, లియొనార్డో డి కాప్రియో ప్రధాన పాత్రలో $170 మిలియన్లు ఖర్చుతో వార్నర్ బ్రదర్స్ ఈ వేసవికి విడుదల చేసారు(యుకేలో పదహారు జులైన).కాబ్(డి కాప్రియో) ఒక విచిత్రమైన దొంగ. ప్రముఖులను కలలోకి పంపి ఆ కలలలో వారి రహస్యాలను దొంగతనం చేయడంలో దిట్ట. అతను సాటో వద్ద పని చేస్తుంటాడు. తను పనికి సంబంధించిన కారణాల వలన తన కుటుంబానికి దూరంగా ఉండవలసి వస్తుంది. అటువంటి సమయంలో సాటో కాబ్ ని ఇన్।సెప్షన్ చేయమని కోరతాడు, ఆ పని పూర్తయితే కాబ్ శాశ్వతంగా తన కుటుంబంతో కలిసి ఉండవచ్చని ప్రతిపాదన తేవడంతో కాబ్ ఇన్।సెప్షన్ చేయడానికి సిద్దమవుతాడు.

ఇన్।సెప్షన్ అంటే ఏమిటి, కాబ్ సమర్ధవంతంగా పని పూర్తిచేయగలిగాడా, ఆ ప్రక్రియలో తనకెలాంటి పరిస్థుతులెదురైనాయి అనేది సినిమా. ఖర్చు చేసిన ప్రతీ పైసను తెరపై సమర్ధవంతంగా చూపాడు, సినిమాలో ప్రధానంగా ఆరేడు పాత్రలకి మించకున్నా సినిమా పూర్తయిన తరువాత కేవలం ఛాయాగ్రహణం, మెదడుని తొలుస్తున్న కథ తప్ప ఏ పాత్ర గుర్తుకు రాదు. అలాగని ఎవరు బాగా చేయలేదని కాదు, కథావిషయం(కథ కాదు), ఛాయాగ్రహణం ప్రభావం అలాంటిది. అసలే కథలో ఉన్న సంక్లిష్టత మెదడుకు పని చెబుతుంటే, ఫోటోగ్రఫీ కళ్ళకు పని చెబుతుంది. ఈ సినిమా చిత్రీకరణకు ఎక్కువ శాతం CGI బదులు కెమెరాలానే ఆశ్రయించారు , ప్రస్థుతానికి ట్రైలర్లలో చూపిస్తున్న నగరం పైకి లేచే సన్నివేశం ఒక సెట్।ని హైడ్రాలిక్స్।తో పైకి లేపి తీసారంట. భూమ్యాకర్షణ లేని సమయంలో తీసిన పోరాటాలు అద్భుతంగా ఉన్నాయి.

సినిమా చూస్తూ మెదడుకు మేత వేయాలనుకునే వాళ్ళు తప్పకుండా చూడవలసిన సినిమా.

చివరగా: జేబులో రెండు టిక్కెట్లు కొనడానికి డబ్బులుంటేనే వెళ్ళండి, మొదటిసారే అర్థమయితే అద్భుతాన్ని మరొకసారి చూడాలన్న ఉత్సుకత మిమ్మల్ని రెండోసారి వెళ్ళేలా చేస్తుంది, మొదటిసారి అర్థంకాకపోతే రెండోసారి చూడాటానికి :)